Meri KHak Mein Wila Ka Na Koi Sharar Hota
meri KHak mein wila ka na koi sharar hota
na hi dil se aag uThti na ye be-qarar hota
mere sar pe hath rakhna jo tera shiar hota
main na dar-ba-dar bhaTakta kahin aar-par hota
main rahin-e-qalb-e-muztar tu charagh-e-shadmani
teri mahfil-e-tarab mein kahan dil-figar hota
teri be-KHudi ne ai dil kisi kaam ka na chhoDa
teri baat Tal deta to na KHud pe bar hota
tere husn ki kahani meri chashm-e-tar se nikli
main na ashk-bar hota to na aashkar hota
agar is pe baiTh jata koi murgh-e-na-umidi
mera naKHl-e-arzu phir kahan saya-dar hota
Zulfiqar Naqvi 
(1312) Peoples Rate This