Tamam Rasta Phulon Bhara Tumhaara Tha
tamam rasta phulon bhara tumhaara tha
hamari rah mein bas naqsh-e-pa hamara tha
us ek saat-e-shab ka KHumar yaad karen
badan ke lams ko jab hum ne mil ke banTa tha
wo ek lamha jise tum ne chhu ke chhoD diya
us ek lamhe mein kaif-e-visal sara tha
phir is ke baad nigahon ne kuchh nahin dekha
na jaane kaun tha jo samne se guzra tha
ab us ke nam pe dil ne dhDakna chhoD diya
wo jis ko hum ne kabhi be-hisab chaha tha
wo jis ko dekha tha akasr hujum-e-yaran mein
wo ek shaKHs bahut un dinon akela tha
tamam saut-o-sada chup se ho gae the 'zubair'
wo jab sukut ke patthar pe gir ke TuTa tha
Zubair Rizvi 
(1981) Peoples Rate This