Milan Mausamon Ki Saza Chahta Hun
milan mausamon ki saza chahta hun
tere hijr ki intiha chahta hun
sadaon se mahrum apni gali mein
bas ek teri aawaz-e-pa chahta hun
kisi ek halchal mein wo sath hota
main aawara-e-shab bujha chahta hun
gulabon ke honTon pe lab rakh raha hun
use der tak sochna chahta hun
teri qurbaten rakh hone lagi hain
main ab duriyon mein jiya chahta hun
koi rahguzar ho kahin ka safar ho
main har ja tere naqsh-e-pa chahta hun
bahut din hue mor nache nahin hain
munDeron pe kali ghaTa chahta hun
Zubair Rizvi 
(1238) Peoples Rate This