Kaliyan ChaTak Rahi Hain Bahaaron Ki God Mein
kaliyan chaTak rahi hain bahaaron ki god mein
jalwon ki mahfilen hain sitaron ki god mein
wo mauj jis ke KHauf se patwar gir paDe
kashti ko le gai hai kinaron ki god mein
manzil simaT ke KHud hi mere pas aa gai
main sar-garan thi rah-guzaron ki god mein
yun to diye fareb sahaaron ne umr bhar
dil ko baDa sukun tha sahaaron ki god mein
tera KHayal teri mohabbat gham-e-hayat
sab so gae hain waqt ke dhaaron ki god mein
manus ho gai hun KHizan se ye soch kar
kuchh bhi nahin 'nasim' bahaaron ki god mein
Zohra Naseem 
(1571) Peoples Rate This