Shahr-e-ashob
wahi sada jo mere KHun mein sarsaraati thi
wo saya saya hai ab har kisi ki aankhon mein
ye sarsarahaTen sanpon ki siTiyon ki tarah
siyahiyon ke samundar ki tah se mauj-ba-mauj
hamari bikhri safon ki taraf lapakti hain
badan hain barf, ragen rahguzar-e-reg-e-rawan
kai to sahm ke chup ho gae hain surat-e-sang
jo bach gae hain wo ek dusre ki gardan par
jhapaT paDe hain misal-e-sagan-e-awara
hawa guzarti hai sunsan siskiyon ki tarah
sada-e-dard jo mere lahu mein larzan thi
jhalak rahi hai wo ab be-shumar aankhon mein
labon pe sukh gai harf-e-shauq ki shabnam
kisi mein taqat-e-guftar agar kahin hai bhi
to lafz aate hain honTon pe hichkiyon ki tarah
tarashiye to kai pattharon ke sinon mein
shajar ki shaKHon ke manind naqsh phaile hain
par un ke reshon mein zauq-e-numu nahin malta
koi nafeer ki jis ki nawa-e-hosh-nawaz
dilon se dur kare sarsarahaTon ka tilism
koi umid ka paigham koi pyar ka ism
wo KHwab-e-parwarish-e-jaan ki jis pe sadqe hon jism
Zia Jalandhari 
(1258) Peoples Rate This