Hum

1

bichhi hui hai bisat kab se

zamana shatir hai aur hum

is bisat ke zisht-o-KHub-KHanon mein

dast-e-nadida ke ishaaron pe chal rahe hain

bichhi hui hai bisat azal se

bichhi hui hai bisat jis ki na ibtida hai na intiha hai

bisat aisa KHala hai jo wusat-e-tasawwur se mawara hai

karishma-e-kaenat kya hai

bisat par aate jate mohron ka silsila hai

bisat sakit hai waqt-e-mutlaq

bisat be-jumbish aur be-his hai

apne mohron se la-talluq hai

us ko is se gharaz nahin hai

ki kaun jita hai

aur kis ne shikast khai

wajud hadis wajud mohre

bisat-e-sakit ki wusaton mein

zamin ahl-e-zamin aflak ahl-e-aflak

apni apni muayyana saaton mein aise guzar rahe hain

ki jaise aankhon se KHwab guzren

bisat par jo bhi hai

wo hone ki mohlaton mein asir

paiham badal raha hai

wajud wo hiddat-e-rawan hai

jo nit-nai haiaton mein baqi hai

aur us ko fana nahin

jahan pahaDon ke aasman-bos silsile hain

wahan kabhi bahr maujzan the

jahan bayaban mein ret uDti hai

baad-e-masmum gunjti hai

wahan kabhi sabza-zar-o-gul-gasht ka saman tha

buland-o-baala haqir-o-hech

is shikast-o-tamir ke tasalsul mein bah rahe hain

shikast-o-tamir ke tasalsul mein tu hai main hun

hum aise mohre

jinhen irade diye gae hain

ye jan ki taufiq par haden hain

jinhen tamanna ke rang dikhla diye gae hain

magar wasilon par qadghanen hain

jinhen mohabbat ke Dhang sikhla diye gae hain

pa dast-o-pa mein salasil-e-nau bano

to gardan mein tauq pahna diye gae hain

jo hai jo ab tak hua hai jo ho raha hai

us se kise mafar hai

koi jo chahe

ki ahd-e-rafta se ek pal phir se lauT aae

kaha hua lafz an-kaha ho sake

to is aarzu ka hasil wo jaanta hai

bahut sahi iKHtiyar-o-imkan

barg-o-KHas ki tab-o-majal kya hai

numu-e-ghuncha mein us ka apna kamal kya hai

teri nigahon mein tera gham koh se giran-tar hai

tu samajhta hai

tere sine ke surKH lawe se

shahr-o-qarya pighal rahe hain

KHizan zamistan teri udasi ke aaine hain

tu mushtail ho to zalzalon se zamin kanpe

tujhe guman hai

ki gul khile hain tere tabassum ki pairwi mein

ye phul ko iKHtiyar kab tha

ki kaun si shaKH par khile

kaun kunj mein muskurae

aur kin fazaon mein KHushbuen bikhere

nahif shoala jamal konpal

jo dast-e-nazuk ki narm poron se dhire dhire

daricha-e-shaKH khol kar

subh ki sapedi mein jhankti hai

ye sochti hai

ki bagh sara usi ke dam se mahak raha hai

usi ke partaw se gosha gosha damak raha hai

usi ke didar mein magan

KHushbuon se bojhal hawaon mein

shoKH titliyan raqs kar rahi hain

wo be-KHabar hai

ki shatir-e-waqt ki nazar mein

koi ikai

shajar hajar ho ki zi-nafas ho

nizam-e-kul se alag nahin hai

wo ye nahin jaanti ki hasti ke kar-KHane mein

us ka hona na hona be-nam hadisa hai

aur us ke hisse ka kul asasa

wo chand lamhe wo chand sansen hain

jin mein wo KHwab dekhti hai

saliqa-e-zat se chaman ko sanwarne ka

bahaar-e-jaan ko nikhaarne ka

2

baja ki na-paedar hai ye wajud mera

main ghair-fani hayat ke silsile mein

ek bich ki kaDi hun

rahin-e-gardish bhi markaz-e-kaenat bhi hun

jo main ne dekha hai wo mere KHun mein rach gaya hai

jo main ne socha hai mujh mein zinda hai

aur jo kuchh suna hai mujh mein sama gaya hai

hawa ki surat har ek ehsas

meri sanson mein ji raha hai

har ek manzar mere tasawwur mein bas gaya hai

main zat-e-mahdud apni pahnaiyon mein

ek kaenat bhi hun

meri ragon mein wo joshash-e-jawedan rawan hai

jo shaKH mein phul ki numu hai

jo bahr mein mauj ki taDap hai

par-e-kabutar mein tab-e-parwaz hai

sitaron mein raushni hai

main apne hone ke sab hawalon mein runuma hun

main ja-ba-ja surat-e-saba hun

ghazal-e-KHush-chashm ki kaliyon mein khelta hun

humakte bachche ki muskurahaT hun

pir-e-shab-KHez ki dua hun

main mehr mein mahtab mein hun

ye kaisi chahat hai jis se main

ek mustaqil iztirab mein hun

wo kaun si manzil talab thi

ki ranjha ranjha pukarti hir

aap hi ranjha ho gai thi

falak se anwar

koh se chashme

shaKH se phul phuTte hain

magar har ek phul mein nami bhi hai raushni bhi

zaban mein alfaz

aankh mein did

dil mein ehsas rakh diye gae hain

pa lafz ehsas did ek dusre ka paiwand ho gae hain

numu-o-taKHliq ke amal bar bar dohrae ja rahe hain

jamal-e-arz-o-sama ki takmil ho rahi hai

mohabbat eajaz-e-sarmadi hai

tumhaari aankhon ki muskurahaT mein

meri chahat ki raushni hai

yunhi shagufon ke pas baiThi raho

shuaon ko aariz-o-lab se khelne do

hawa ke hathon ko apne gesu bikherne do

bahaar ki sari KHushbuen

apne bazuon mein sameT lo

mere chashm-o-dil ko yaqin dilao

ki tum faqat KHwab hi nahin ho

guzarte baadal ka koi aks-e-rawan nahin ho

tum ek haqiqat ho mahz wahm-o-guman nahin ho

mere qarib aao aur meri zat ko miTa do

mujhe tum apne jamal ki zau mein jazb kar lo

visal mein fard ki fana hai

visal mein fard ki baqa hai

visal mein fard ki baqa hai

bahaar ki did aarzi hai

bahaar-e-tajrid daimi hai

widaa ke waqt aansuon mein

wo sare manzar jhalak rahe hain

jo shaKH-e-jaan par gulon ki surat khile hue the

wo sare imkan jhalak rahe hain

jo kirchi kirchi bikhar gae hain

bikharne walon ko apne markaz ki aarzu hai

nahin mujhe is tarah na dekho

ki jaise nazron mein ruh tak umDi aa rahi ho

ye hath kuchh der aur rahne do mere hathon mein

kuchh na bolo

ki main ye nayab lamhe aankhon mein jazb kar lun

ye saniye ruh mein chhupa lun

har ek lamha ek armughan hai

tumhaari chahat ka armughan hai

ye saniye aise phul hain

jo ki khilte rahte hain dil hi dil mein

shagufta rahte hain rahte dam tak

ye chand lamhe kisi kisi ke nasib mein hain

wagarna umren

ghamon ke kanTe nikalne mein guzar gai hain

3

wo sham hotel mein is tarah aai

jaise dushman ki fauj utre

jagah jagah jast aur kansi ke chehre

jham jham khanak rahe the

tamam hotel jigar jigar jagmaga raha tha

main kunj tanhai mein tahayyur se dekhta tha

ki kaise KHush-bash hain jinhen ye KHabar nahin hai

ki un ki buniyaad ukhaD chuki hai

hawaen masmum ho chuki hain

shajar phalon se lade hain lekin

jaDon ka zahr un phalon ke reshon tak aa gaya hai

jo haal ab hai kabhi nahin tha

hayat KHar-o-zabun to thi lekin itni KHar-o-zabun nahin thi

wo der se intizar-gah mein

har aane wale ko nazron nazron mein napti thi

libas ki shoKHi-o-jasarat

singhaar ki jiddat-o-mahaarat ke bawajud

is ka gosha-e-chashm umr ki chughli kha raha tha

nigah nau-warid ajnabi par paDi to is tarah muskura di

ki jaise us ki hi muntazir thi

uThi qarib aai aur boli

main ek muddat se KHidmat-e-KHalq kar rahi hun

dukhe dilon ka ilaj karti hun

rang aur raushni ke shahron mein

sham-e-tanhai ki dil afsurdagi se waqif hun

aap akele hain to koi intizam kar dun

yahan se main dur dur mulkon ko

har tabiat ke gahakon ki pasand ka mal bhejti hun

wafa mohabbat purani baaten hain ab inhen kaun puchhta hai

baDe baDe unche unche logon se raat din mera wasta hai

ye sahiban-e-waqar-o-naKHwat

KHaridna aur bechna KHub jaante hain

ye dam dete hain aur rahat KHaridte hain

baja hai ye bhi ki be-bason ki ana-o-izzat KHaridte hain

magar jab aate hain bechne par

to be-takalluf zamir tak apna bech dete hain

jah-o-sarwat ki manDiyon mein

main kah rahi thi ki aap chahen to

aaj ki raat ka koi intizam kar dun

wo sham ke waqt KHun mein lat-pat

saDak ke kinare paDa hua tha

guzarne walon se kah raha tha

hamein hamare muhafizon se

najat ka rasta batao

wo KHwahish-e-iqtidar-o-daulat mein

hum ko nilam kar rahe hain

uKHuwwat-o-ittihad ka dard dene wale

KHud apne bachchon ke KHun se

hirs-o-hawas ki shamen jala rahe hain

hamari aqdar

aaj matruk fashionon ke libas ki tarah

un ki nazron se gir chuki hain

ab un ki aulad un ki resha-dawaniyon se panah

taza b-taza nashon mein DhunDti hai

inhi ki shah pa ke nasl-e-nau

apni pyas ek dusre ke KHun se bujha rahi hai

ye sang-dil jashn-e-marg-e-amboh-e-be-gunahan mana rahe hain

koi hamein in najib surat

haris be-mehr kargon se

najat ka rasta batao

ye naghma-e-kaenat ki be-suri sadaen hain

koi in se najat ka rasta batao

4

hum apne KHwabon mein ji rahe hain

hum apne subh-o-sham se tang aa ke

KHwab bunte hain aur KHwabon mein ji rahe hain

bisat-e-sakit se koi shikwa

na shatir-e-waqt se gila hai

hamein shikayat hai aadmi se

ki aadmi aadmi ka dozaKH bana hua hai

ajab tazadat ka muraqqa hai aadmi bhi

wo ahrman bhi hai aur yazdan-jamal bhi hai

sadaqat-o-husn ka talabgar bhi wahi hai

bahimiyat aur wahshat-o-jabr ka parastar bhi wahi hai

zamin pe qabil ke qabile ki rasm-e-be-dad auj par hai

magar hamara azab is se bhi talKH-tar hai

ki hum jo habil ke hawari the

ahd-e-habil mein bhi zanjir hi rahe hain

shabahaton ke fareb-KHurda the ye na jaana

naqab-poshon mein kaun kya hai

hamein to gham tha ki nashsha-e-iqtidar

qabil ho ki habil

jis kisi ko chaDha

wo insaniyat ko taraj kar gaya hai

hamare KHwabon se Dar rahe hain

wo Dar rahe hain ki KHwab alfaz mein Dhale to

darogh ke parde chaak honge

aur un ke chehron ka ghaza utra

to aaine bhi azab honge

hum aise mohre

jinhen irade diye gae hain

ye jin ki taufiq par haden hain

hamein shikasten huin magar har shikast mahmez ho gai hai

hamare sathi gire pa raftar aur kuchh tez ho gai hai

yahan ki sangin be-hisi mein

hamari koshish ka haal ye hai

ki jis tarah koi titari

ek KHizan-zada bagh-e-be-numu mein

bhari bahaaron ki justuju mein

tabassum-e-gul ki aarzu mein

shajar shajar shaKH shaKH betab phir rahi ho

hamare hote bahaar aae na aae lekin

hamein ye taskin hai ki hum ne

hayat-e-na-paedar ki ek ek saat

chaman ki haiat sanwarne mein guzar di hai

faza-e-hasti nikhaarne mein guzar di hai