فائرنگ
فائرنگ ہو رہی ہے
فائرنگ ہو رہی ہے
کرکٹ کھیلتے ہوئے بچے
شور مچاتے ہیں
مگر گھر میں نہیں جاتے
جیسے فائرنگ ایک جدید لوک گیت ہے
جس کی دھن پر
شور مچاتے دوڑتے ہوئے
کرکٹ کھیلی جا سکتی ہے
یا پھر
بچوں گنتی سکھانے کا
کوئی نیا طریقہ
وہ روزانہ ایک سے دس
دس سے سو
اور پھر بغیر رکے سو سے ہزار تک جا پہنچے ہیں
مگر فائرنگ بند نہیں ہوتی
وہ مسلسل جاری رہتی ہے
ہمیں پتا چلتا ہے
بہت معمولی وجہ سے
فائرنگ ہوتی رہتی ہے
دو دوست ایک چڑیا کو
کپڑے سے بنی ایک ڈری ہوئی چڑیا کو مارنے کے لیے نشانہ بازی کی مشق کر رہے تھے
یا دو بھائی چھت پر رکھے ہوئے
گھی کے خالی ڈبوں شربت کی بوتلوں کو
آسانی سے نیچے لانا چاہ رہے تھے
یا دیوار پر چپکے ہوئے
پچاس پیسے کے کھوٹے سکے کو
زمین پر گرانے کے لیے
اتنی گولیاں چلائیں گئیں
کہ لوگ ڈر گئے
انہیں ڈرنا نہیں چاہیئے
ہم کہتے ہیں اتنی چھوٹی باتوں پر
انہیں ڈرنا نہیں چاہیئے
فائرنگ تو آغاز ہے
کچھوے اور خرگوش کی دوڑ کا
چوہے اور بلی کے مقابلے کا
اگر آپ اسے موسیقی سمجھتے ہیں
تو پھر پوری طرح اس سے لطف اندوز ہوں
شور سمجھتے ہیں
تو اپنے کانوں میں روئی ٹھونس لیں
دستک سمجھتے ہیں
تو اپنے گھر کا دروازہ
دل کی طرح بند رکھیں
اور جب تک
فائرنگ ہو رہی ہے
باہر نہ نکلیں
ذیشان ساحل 
(998) ووٹ وصول ہوئے
Firing In Urdu By Famous Poet Zeeshan Sahil. Firing is written by Zeeshan Sahil. Enjoy reading Firing Poem on Inspiration for Students, Youth, Girls and Boys by Zeeshan Sahil. Free Dowlonad Firing by Zeeshan Sahil in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends