Sanp
ek sanp ko
main ne titli bana diya
aur ek kanTe ko
tabdil kar diya phul mein
band gali ke aaKHiri sire par
jo diwar thi
main ne use
shahr ki taraf khulne wala
darwaza bana diya
zahr ke dariya ko
main ne rakh diya
shahd ki botal mein
aur chhupa diya
us ki nazron se bhi
us ki taswir ko
jise main apna aaina samajhta tha
us ke baad
jab wo aai aur dohrane lagi
wo lafz
jo kabhi us ke liye be-asar tha
aaj us ek lafz ka
mujh par koi asar hi nahin hua
main to
use pahchan hi na saka
yaad bhi na rakh saka
sanp ko
Zeeshan Sahil 
(1207) Peoples Rate This