Kitabi KiDe
ek nazm se
dusri nazm tak jaane mein
wo ziyaada waqt nahin lete
agar kahin likha hua ho
dariya
aur us ke baad koi pul na ho
tab inhen koi nahin rok sakta
wo bahut tez tez chalte hue
sada bahaar phulon ke namon se
KHizan mein girne wale
aaKHiri pate tak ja pahunchte hain
agar hamari nazmon ka shair
kisi kahani mein
apni mahbuba se aaKHiri bar mil raha ho
ya kisi Drame mein use pahli dafa dekh raha ho
unhen ziyaada der nahin lagti
mohabbat ko KHatm karte hue
stage ko dimak lagate hue
Zeeshan Sahil 
(1140) Peoples Rate This