Chaqu
hamari tanhai se
ek lalTain banai ja rahi hai
jise tufani barish mein
hangami taur par istimal kiya jaega
ya sone ki kan mein kaam karne walon ko
muft faraham kiya jaega
hamari tanhai se
ek bagghi banai ja rahi hai
jise tafrihi maqamat par rakha jaega
ya express train ke
paTri se utar jaane ke baad
KHarab mausam mein
rawana kya jaega
hamari tanhai se
ek pul banaya ja raha hai
jise jang ke dauran ya baad mein
Tankon ke guzar jaane ke liye
istimal kiya jaega
ya achanak
dhamake se uDa diya jaega
hamari tanhai se
ek chaqu banaya ja raha hai
jise kaghaz kaTne aur seb tarashne ke
kaam mein laya jaega
aur
zang-alud hone par
hamare dil mein
utar diya jaega
Zeeshan Sahil 
(1031) Peoples Rate This