Zindagi Khaar-zar Mein Guzri
zindagi KHar-zar mein guzri
justaju-e-bahaar mein guzri
kuchh to paiman-e-yar mein guzri
aur kuchh e'tibar mein guzri
manzil-e-zist hum se sar na hui
yaad-e-gesu-e-yar mein guzri
phul giryan the har kali larzan
jaane kaisi bahaar mein guzri
zindagani tawil thi lekin
maut ke intizar mein guzri
aap se mil ke zindagi apni
justuju-e-qarar mein guzri
jo bhi guzri buri bhali 'sani'
aap ke iKHtiyar mein guzri
Zareena Sani 
(1056) Peoples Rate This