حکایت گریزاں
میں کہ لا انتہا وقت کی رہ گزر پر
صرف اک لمحۂ مختصر
میں کہ احساس و افکار کے بحر ذخار میں
صرف اک قطرہ مضطرب میں کہ صحرائے ہستی کی تپتی ہوئی ریت پر
صرف اک ذرہ سرنگوں
میں کہ اک وسعت کائنات حسیں میں
صرف اک نقطۂ بے سکوں
میں وہ قطرہ کہ جس میں سمندر کی بیتابیاں موجزن ہیں
وہ لمحہ جو مستقبل و حال و ماضی کا آئنہ ہے
میں وہ نقطہ کہ جو گردش دہر کا آشنا ہے
میں وہ ذرہ کہ صحرائے ہستی کی تشنہ لبی
اپنے دل میں چھپائے
میں وہ اک جسم نازک کہ جو
نسل انساں کے درد اور عصیاں کا بار گراں
اپنے سر پر اٹھائے
میں وہ اک چشم پر شوق جس کے لیے وسعت دشت و صحرا بھی کم تھی
میں نے پھر چاند تاروں پر ڈالی کمندیں
آسمانوں کے وہ جگمگاتے مکیں
اس انوکھی جسارت پہ سب مسکرائے
میں کہ خود محرم ذوق پرواز
ہم راز سر بلندی
چاند تاروں کی محفل سے نظریں چرائے
میں کہ خود ساغر شوق
پیمانۂ جذب و مستی
حلقۂ مے گساراں سے دامن بچائے
میں کہ خود جرأت احترام دید
خود جرأت احترام
صرف اک جرأت آرزو پر پشیماں
میں کہ خود سارے عالم کے درد و الم کی امیں
اپنے زخموں کے آتش نوائی پہ خنداں
میں کہ ہر راز سر بستہ سے آشنا
میں کہ آہنگ ہستی کی ہم راز ہوں
میں ہوں صدیوں کی کھوئی ہوئی اک صدا
میں عناصر کا ٹوٹا ہوا ساز ہوں
زاہدہ زیدی 
(1454) ووٹ وصول ہوئے
Hikayat-e-gurezan In Urdu By Famous Poet Zahida Zaidi. Hikayat-e-gurezan is written by Zahida Zaidi. Enjoy reading Hikayat-e-gurezan Poem on Inspiration for Students, Youth, Girls and Boys by Zahida Zaidi. Free Dowlonad Hikayat-e-gurezan by Zahida Zaidi in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends