کائناتی گرد میں برسات کی ایک شام
ویسے تو پہاڑ زمین کا سکڑا ہوا لباس ہیں
لیکن جب بارش ہوتی ہے
ان کی سلوٹوں پر اجلاہٹ اگ آتی ہے
سانپ کی دم سی سڑک پر چلتے ہوئے
موسم مجھے اپنی کنڈلی میں قید کر لیتا ہے
لہر در لہر منقسم پہاڑوں کا حسن
رنگوں کی اس دھندلاہٹ میں پوشیدہ ہے
جسے ہماری بیمار آنکھیں کبھی منعکس نہیں کر پاتیں
بارش کے بعد
جب دھرتی اپنے میلے کپڑے اتارتی ہے
میں ہر شام، رازوں کے تعاقب میں
اس کے داؤدی بدن پر پھیل جاتا ہوں
اور دیواریں پھلانگتا، خدا کے شکستہ صحن میں
نقب لگاتا ہوں
میرے وجود میں ایک اندھا خلا پھیلنے لگتا ہے
میں دیکھتا ہوں
آسمان میں کوئی عقاب چھپا ہے
جو ہماری زندگیوں کے چوزے اچک رہا ہے
میں ان درختوں سے مخاطب ہوتا ہوں
جن کی جڑوں میں چیونٹیاں
اپنی موت پر سوگوار رہتی ہیں
بھیگی شاخوں پر سہمے کوے رات بھر کانپتے رہتے ہیں
کتنی بے رحم لگتی ہے زندگی!
جہاں موت برستی ہے
اور لاکھوں سانسیں بے وقعت آوارہ کتوں کی طرح
مر جاتی ہیں
وہاں پھر مسکراتا گھنا جنگل اگ آتا ہے
اس لامتناہی وسعت میں ہم صابن پر چمٹے بال سے
زیادہ کچھ نہیں رہتے
وقت جسے، ایڑی پر جمے میل کی طرح دھو ڈالتا ہے
میں اپنی ضعیف سائنسی قوت سے محسوس کرتا ہوں
سب سے عظیم دکھ یہی ہے
کہ کائنات ہماری دسترس میں نہیں
اس رنجوری سفر سے بے بس لوٹتے ہوئے
میں جوتوں سے مٹی جھاڑتا ہوں
اور کھڑکی سے جھانکتے اجلے منظر میں
بے فکری کی چائے پینے لگتا ہوں
دور پہاڑوں پر، مسلسل بارش ہوتی رہتی ہے
زاہد امروز 
(1484) ووٹ وصول ہوئے
Kaenati Gard Mein Barsat Ki Ek Sham In Urdu By Famous Poet Zahid Imroz. Kaenati Gard Mein Barsat Ki Ek Sham is written by Zahid Imroz. Enjoy reading Kaenati Gard Mein Barsat Ki Ek Sham Poem on Inspiration for Students, Youth, Girls and Boys by Zahid Imroz. Free Dowlonad Kaenati Gard Mein Barsat Ki Ek Sham by Zahid Imroz in PDF.
Sad Poetry in Urdu, 2 Lines Poetry in Urdu, Ahmad Faraz Poetry in Urdu, Sms Poetry in Urdu, Love Poetry in Urdu, Rahat Indori Poetry, Wasi Shah Poetry in Urdu, Faiz Ahmad Faiz Poetry, Anwar Masood Poetry Funny, Funnu Poetry in Urdu, Ghazal in Urdu, Romantic Poetry in Urdu, Poetry in Urdu for Friends