Hath Se Haihat Kya Jata Raha
hath se haihat kya jata raha
marne jine ka maza jata raha
zindagi ka aasra jata raha
hae jine ka maza jata raha
le gaya sarmaya-e-sabr-o-qarar
maya-dar ab sabr ka jata raha
umr bhar ki sab kamai luT gai
zist ka barg-o-nawa jata raha
dil agar baqi raha kis kaam ka
chain dil ka ai KHuda jata raha
zindagani ki halawat uTh gai
dana-pani ka maza jata raha
jo sahaara tha dam-e-darmandagi
wo buDhape ka asa jata raha
kijiye kis baat ki ab aarzu
aarzu ka muddaa jata raha
gul hua apna charagh-e-arzu
nur ghar ka ai KHuda jata raha
hae kaisa luT gaya bagh-e-murad
kya shajar phula-phala jata raha
roiye kya zindagani ko 'zahir'
maut ka bhi ab maza jata raha
(1147) Peoples Rate This