Yaad Mein Teri Do Aalam Ko Bhulana Hai Hamein
yaad mein teri do aalam ko bhulana hai hamein
umr bhar ab kahin aana hai na jaana hai hamein
kahte hain ishq ka anjam bura hota hai
ab to kuchh bhi ho mohabbat ko nibhana hai hamein
KHalish-e-ishq se be-chain hai dil ek taraf
us pe yarab gham-e-hasti bhi uThana hai hamein
hae wo aag jo mushkil se jali thi dil mein
aaj us aag ke shoalon ko bujhana hai hamein
ruKHsat arz-e-tamanna nahin milti na mile
qissa-e-shauq nigahon se sunana hai hamein
aap kanTon se jo bachte hue chalte hain chalen
daman-e-shauq ko phulon se bachana hai hamein
hae is sharm-e-mohabbat ka bura ho 'taban'
ishq ka raaz ab un se bhi chhupana hai hamein
Zafar Taban 
(701) Peoples Rate This