Aati Hai Fughan Lab Pe Mere Qalb-o-jigar Se
aati hai fughan lab pe mere qalb-o-jigar se
khul jae na ye bhed kahin teri nazar se
rakkha hai tere gham ko hamesha tar-o-taza
Tapka lahu aankhon se kabhi zaKHm-e-jigar se
le chhoD diya shahr tera kahne pe tere
ab ho gae hum dur bahut tere nagar se
duniya pe hua raaz mohabbat ka yun ifsha
taDpaya bahut tu ne uThaya hamein dar se
mansub hain tujh se jo mohabbat ke fasane
waqt aaya to likkhenge kabhi KHun-e-jigar se
sine mein kahin rukta hai sailab-e-junun-KHez
dil KHun hua mera mohabbat ke asar se
sailab-e-hawadis bhi hua sharm se pani
aankhon se meri ashk kuchh is shan se barse
Yogendra Bahal Tishna 
(767) Peoples Rate This