Chah Thi Mehr Thi Mohabbat Thi
chah thi mehr thi mohabbat thi
us ki har baat hi qayamat thi
wasl tha qurb tha qarabat thi
dil ko phir bhi ajib wahshat thi
ab to hum soch kar bhi hanste hain
awwal-e-ishq kaisi haalat thi
main bahut KHush raha hun us ke baghair
us ko is baat par bhi hairat thi
bas use chumte hi chhoD diya
pattharon se mujhe to wahshat thi
main to kuchh in dinon pareshan tha
us ko kab bhulne ki aadat thi
main hi us waqt tujh se bachhDa tha
jab teri chahaton mein shiddat thi
Yashab Tamanna 
(1128) Peoples Rate This