BaiTha Hun Panw ToD Ke Tadbir Dekhna
baiTha hun panw toD ke tadbir dekhna
manzil qadam se lipTi hai taqdir dekhna
aawaze mujh pe kaste hain phir bandagan-e-ishq
paD jae phir na panw mein zanjir dekhna
murdon se shart bandh ke soi hai apni maut
han dekhna zara falak-e-pir dekhna
hosh uD na jaen sanat-e-behzad dekh kar
aaina rakh ke samne taswir dekhna
parwane kar chuke the sar-anjam KHud-kushi
fanus aaDe aa gaya taqdir dekhna
shayad KHuda-na-KHasta aankhen dagha karen
achchha nahin nawishta-e-taqdir dekhna
baad-e-murad chal chuki langar uThao 'yas'
phir aage baDh ke KHubi-e-taqdir dekhna
Yagana Changezi 
(938) Peoples Rate This