غم جاں تو ہے اگر راحت جاں ہے تو ہے

غم جاں تو ہے اگر راحت جاں ہے تو ہے

ہم نے یہ جان لیا جان جہاں ہے تو ہے

وہ خریدار جو خواہاں ہو متاع دل کا

کس کو بتلاؤں وہ دل خواہ کہاں ہے تو ہے

صید دل ایک بھی جاں بر ترے ہاتھوں نہ ہوا

ناوک انداز جو بے تیر و کماں ہے تو ہے

دل بے نام و نشاں پر مرے جوں نقش نگیں

نام کا جس کے نمودار نشاں ہے تو ہے

شمع فانوس تجھے کہیے کہ ہر مجلس میں

ہے نہاں پردے میں اور صاف عیاں ہے تو ہے

کیا کہوں اے دل جاں کاہ مری چھاتی پر

اس کی فرقت میں جو اک کوہ گراں ہے تو ہے

چھوڑ کے ضعف میں تنہا تو نہ جاوے غم دوست

اب مرے جی میں جو کچھ تاب و تواں ہے تو ہے

چمن دہر میں نرگس کی طرح دیدۂ زار

جس کے دیدار کی خاطر نگراں ہے تو ہے

کس کو شیریں کہوں اب جس کی ہے خون فرہاد

جوئے خوں ہر مژہ میرے سے رواں ہے تو ہے

صرف بلبل ہی نہیں نعرہ زناں گلشن میں

گل بھی جس گل کے لئے جامہ دراں ہے تو ہے

کرے تاثیر محبؔ دل میں وہیں سامع کے

پر اثر جس کی محبت کا بیاں ہے تو ہے