سبز سورج کی کرن

سبز بلی سبز

آنکھیں سبز

سورج کی کرن

جب نیم خوابی کی طرح اس آنکھ اوپر

جھولتی ہے جھومتی ہے سبز

آنکھیں سبز روشن

رنگ کی باریک لہریں

ارغوانی قرمزی تھوڑا بہت سونے کا جھلمل رنگ

آنکھیں زندگی بنتی ہیں دھندلی روشنی میں

سبز بھوری آنکھیں کھلتی ہیں تو فوراً

قمقمے سی کھلکھلاتی

بے محابا روشنی ہر گوشے سے کھنچ کر سمٹ آتی ہے بھوری سبز

چشم بے حجابی کوندتی ہے

دھوپ کی گرمی نظر

بیباک عریاں

پھیلتے پارے کی صورت شاہراہوں اور گھروں میں

موجزن ہے سبز آنکھیں سبز

شفاف آبگینہ بن گئی ہیں