Main Siyah-ru Apne Khaaliq Se Jo Neamat Mangta

main siyah-ru apne KHaliq se jo neamat mangta

apna munh dhone ko pahle aab-e-KHajlat mangta

mere rukhe-sukhe TukDe mujh ko kar dete hain ser

KHak bhar deta falak munh mein jo neamat mangta

KHalq par hoti jo aadab-e-shahadat aashkar

murgh-e-bismil bhi taDapne ki ijazat mangta

rahm ham-afat-rasidon par jo karta aasman

sans lene ki hujum-e-gham mein mohlat mangta

rolta moti jo karta kisht-kari KHair ki

hun barasta main agar baran-e-rahmat mangta

past-baKHti ne mujhe mahfuz rakkha shukr hai

TuT paDta aasman sar par jo rifat mangta

qadr mere gauhar-e-dil ki kuchh us but ne na ki

but-kada lilam hota main jo qimat mangta

ek bosa mangne par yar ka ruKH phir gaya

jaan main deta agar wo be-murawwat mangta

main agar aazadgi mein sarw ko karta murid

tera guldasta sa qad tuba se baiat mangta

dekh pata kushtagan-e-ishq ka rutba agar

pani pi pi kar KHizar jam-e-shahadat mangta

dil mein paDte zaKHm agar gulzar ki karta hawas

main lahu rota agar baran-e-rahmat mangta

kab raha simab jab simab chandi ho gaya

qalb mahiyyat meri hoti jo daulat mangta

kya KHabar thi subh ho jaegi tere nur se

sham se mera charagh-e-KHana ruKHsat mangta

aankh jhuk jati nazar aata agar tu KHwab mein

tere KHal-e-ruKH se yusuf dagh-e-hasrat mangta

khaiye kyunkar niwale motiyon ke ai hawas

tair-e-dil hans ki ai kash qismat mangta

josh-e-wahshat le chala itni na mohlat de mujhe

koh-o-sahra ke azizon se tu ruKHsat mangta

dushmani rakhta hai arbab-e-manash se aasman

hath malta umr-bhar dam-bhar jo rahat mangta

be diye mumkin nahin duniya mein ho ijra-e-kar

aamilon se ism-e-azam bhi hai dawat mangta

KHun-e-ashiq par kamar bandhe hue hain KHub-ru

tegh-e-misri halq par hoti jo sharbat mangta

kya KHabar thi aasiyon ki bhi dua maqbul hai

'bahr' duniya ke bakheDe se faraghat mangta