Jam Khaali Hain Mai-e-nab Kahan Se Laun
jam KHali hain mai-e-nab kahan se laun
aap ka dida-e-pur-ab kahan se laun
kah sakun un ki nigahon ka tabassum jis ko
ek aisa dil-e-be-tab kahan se laun
ishq KHud apni jagah par hai mukammal lekin
husn ka jauhar-e-nayab kahan se laun
samna tum se mohabbat mein jo ho jae kabhi
ek naya aalam-e-asbab kahan se laun
kaba-o-dair ki rahon se guzar jata hun
mahfil-e-naz ke aadab kahan se laun
ek hi bar nasheman pe giri hai bijli
barha gulshan-e-shadab kahan se laun
jo kabhi un ki tawajjoh ka natija thi 'shajia'
phir wahi kaifiyat-e-KHwab kahan se laun
Nawab Moazzam Jah Shaji 
(1195) Peoples Rate This