GhaTaen Chhai Hain Saghar UTha Le Jis Ka Ji Chahe
ghaTaen chhai hain saghar uTha le jis ka ji chahe
ye mai-KHana hai qismat aazma le jis ka ji chahe
mohabbat karne walon ka jahan mein kaun hota hai
koi apna nahin hum ko sata le jis ka ji chahe
gham-e-dauran se bachna zindagi mein ghair-mumkin hai
gham-e-jaanan ko sine se laga le jis ka ji chahe
kise milti hai fursat umr-bhar aansu bahane se
kali ki tarah dam-bhar muskura le jis ka ji chahe
'shajia' is zindagi mein hum talabgar-e-mohabbat hain
mohabbat se hamein apna bana le jis ka ji chahe
Nawab Moazzam Jah Shaji 
(1202) Peoples Rate This