Apne Shahr Ke Liye Dua
ai shahr-e-be-misal tere baam-o-dar ki KHair
ai husn-e-la-zawal tere baam-o-dar ki KHair
dekhe hain tu ne dur bahut aasman ke
bite hain tujh pe ahd bahut imtihan ke
ai qarya-e-jalal tere baam-o-dar ki KHair
ek dastan hai sath tere rang-o-nur ki
yaaden hain tere sath bahut dur dur ki
KHwab-e-shab-e-jamal tere baam-e-dar ki KHair
tasKHir tujh ko kaun karega jahan mein
tu hai KHuda aur us ke nabi ki aman mein
lahore-e-pur-kamal tere baam-o-dar ki KHair
Muneer Niyazi 
(2623) Peoples Rate This