Mauj-e-KHun Josh Mein Thi Apne Qadam Se Pahle
mauj-e-KHun josh mein thi apne qadam se pahle
koi aaya tha yahan dasht mein hum se pahle
tur be-nur tha musa ke qadam se pahle
kis ne dekha hai tere husn ko hum se pahle
KHair guzri ki junun waqt pe kaam aa hi gaya
sang-e-dar mil gaya mehrab-e-haram se pahle
hum bhi kandhon pe uTha laenge maqtal mein salib
kuchh ishaara to mile ahl-e-karam se pahle
tishnagi-e-lab-e-asghar ka taqaza tha 'raza'
warna talwar uThate na qalam se pahle
Moosa Raza 
(592) Peoples Rate This