Thi Wasl Mein Bhi Fikr-e-judai Tamam Shab
thi wasl mein bhi fikr-e-judai tamam shab
wo aae to bhi nind na aai tamam shab
wan tana tir-e-yar yahan shikwa zaKHm-rez
baham thi kis maze ki laDai tamam shab
rangin hain KHun-e-sar se wo hath aaj-kal rahe
jis hath mein wo dast-e-hinai tamam shab
talu se yan zaban sahar tak nahin lagi
tha kis ko shughl-e-naghma-e-sarai tamam shab
yak bar dekhte hi mujhe ghash jo aa gaya
bhule the wo bhi hosh-ruhai tamam shab
mar jate kyun na subh ke hote hi hijr mein
taklif kaisi kaisi uThai tamam shab
garm-e-jawab-e-shikwa-e-jaur-e-adu raha
us shola-KHu ne jaan jalai tamam shab
kahta hai mehr-wash tumhein kyun ghair gar nahin
din bhar hamesha wasl judai tamam shab
dhar panw aastan pe ki is aarzu mein aah
ki hai kisi ne nasiya-sai tamam shab
'momin' main apne nalon ke sadqe ki kahte hain
un ko bhi aaj nind na aai tamam shab
Momin Khan Momin 
(1772) Peoples Rate This