ShoKH Kahta Hai Be-haya Jaana
shoKH kahta hai be-haya jaana
dekho dushman ne tum ko kya jaana
shola-e-dil ko naz-e-tabish hai
apna jalwa zara dikha jaana
shauq ne durbash-e-ada ko
us ki mahfil mein marhaba jaana
us ke uThte hi hum jahan se uThe
kya qayamat hai dil ka aa jaana
ghar mein KHud-raftagi se dhum machi
kyunke ho us talak mera jaana
puchhna haal-e-yar hai manzur
main ne naseh ka muddaa jaana
mai na utri gale se jo us bin
mujh ko yaron ne parsa jaana
shikwa karta hai be-niyazi ka
tu ne 'momin' buton ko kya jaana
Momin Khan Momin 
(655) Peoples Rate This