Dar To Mujhe Kis Ka Hai Ki Main Kuchh Nahin Kahta

Dar to mujhe kis ka hai ki main kuchh nahin kahta

par haal ye ifsha hai ki main kuchh nahin kahta

naseh ye gila kya hai ki main kuchh nahin kahta

tu kab meri sunta hai ki main kuchh nahin kahta

main bolun to chup hote hain ab aap jabhi tak

ye ranjish-e-beja hai ki main kuchh nahin kahta

kuchh ghair se honTon mein kahe hai ye jo puchho

tu wuhin mukarta hai ki main kuchh nahin kahta

kab pas phaTakne dun raqibon ko tumhaare

par pas tumhaara hai ki main kuchh nahin kahta

naseh ko jo chahun to abhi Thik bana dun

par KHauf KHuda ka hai ki main kuchh nahin kahta

kya kya na kahe ghair ki gar baat na puchho

ye hausla mera hai ki main kuchh nahin kahta

kya kahiye nasibon ko ki aghyar ka shikwa

sun sun ke wo chupka hai ki main kuchh nahin kahta

mat puchh ki kis waste chup lag gai zalim

bas kya kahun main kya hai ki main kuchh nahin kahta

chupke se tere milne ka ghar walon mein tere

is waste charcha hai ki main kuchh nahin kahta

han tang-dahani ka na karne ke liye baat

hai uzr par aisa hai ki main kuchh nahin kahta

ai chaaragaro qabil-e-darman nahin ye dard

warna mujhe sauda hai ki main kuchh nahin kahta

har waqt hai dushnam har ek baat mein tana

phir us pe bhi kahta hai ki main kuchh nahin kahta

kuchh sun ke jo main chup hun to tum kahte ho bolo

samjho to ye thoDa hai ki main kuchh nahin kahta

sunta nahin wo warna ye sargoshi-e-aghyar

kya mujh ko gawara hai ki main kuchh nahin kahta

'momin' ba-KHuda sehr-bayani ka jabhi tak

har ek ko dawa hai ki main kuchh nahin kahta