Adam Mein Rahte To Shad Rahte Use Bhi Fikr-e-sitam Na Hota

adam mein rahte to shad rahte use bhi fikr-e-sitam na hota

jo hum na hote to dil na hota jo dil na hota to gham na hota

hui KHajalat se nafrat afzun gile kiye KHub aaKHirin dam

wo kash ek dam Thahar ke aate ki mere lab par bhi dam na hota

paDa hi marna bas ab to hum ko jo us ne KHat paDh ke nama-bar se

kaha ki gar sach ye haal hota to daftar itna raqam na hota

kisi ke jalne ka dhyan aaya wagarna dud-e-fughan se mere

agar hazaron siphar bante tumhaari aankhon mein nam na hota

jo aap dar se uTha na dete kahin na karta main jabha-sai

agarche ye sarnawisht mein tha tumhaare sar ki qasam na hota

visal ko hum taras rahe the jo ab hua to maza na paya

adu ke marne ki jab KHushi thi ki us ko ranj-o-alam na hota

jahan-e-tang o hujum-e-wahshat gharaz ki dam par buri bani thi

kahan main jata na ji Thaharta kahin jo dasht-e-adam na hota

magar raqibon ne sar uThaya ki ye na hota to be-murawwat

nazar se zahir haya na hoti haya se gardan mein KHam na hota

wahan taraqqi jamal ko hai yahan mohabbat hai roz-afzun

sharik-e-zeba tha bul-hawas bhi jo bewafai mein kam na hota

ghalat ki sanea ko ho gawara KHarash-e-angusht-ha-e-nazuk

jawab-e-KHat ki ummid rakhte jo qaul-e-juffil-qalam na hota

ye be-takalluf phira rahi hai kashish dil-e-ashiqan ki us ko

wagarna aisi nazakaton pe KHiram-e-naz ek qadam na hota

visal to hai kahan mayassar magar KHayal-e-visal hi mein

maze uDate hawas nikalti jo sath andaz-e-ram na hota

hua musalman main aur Dar se na dars-e-waiz ko sun ke 'momin'

bani thi dozaKH bala se banti azab-e-hijr-e-sanam na hota