Nasab-nama
mere ajdad ke girte hue hujre ke
mehrab-e-KHamida mein
kisi sandal ke sanduq-e-tabarruq mein
hiran ki khaal par likkha hua shajara bhi rakkha hai
ki jis par lajawrdi daeron mein
zafrani raushnai se
mere sare aqarib ke muqaddas nam likkhe hain
magar ek daera aisa bhi hai
jis mein se lagta hai
ki kuchh khurcha gaya hai
main in khurche hue lafzon ka waris hun
Moin Nizaamii 
(1216) Peoples Rate This