Yun Samajh Lo Ki Ba-juz Nam-e-KHuda Kuchh Na Raha
yun samajh lo ki ba-juz nam-e-KHuda kuchh na raha
jal ke is aag mein sab KHak hua kuchh na raha
kis ka sar kis ki rida kis ka makan DhunDte ho
qatl o ghaarat mein to koi na bacha kuchh na raha
hum kisi aur ke hone ki KHabar kya dete
gum hue aise ki apna bhi pata kuchh na raha
kachche rangon ki tarah uD gae sare hi huruf
kore kaghaz pe tha jo kuchh bhi likha kuchh na raha
'mohsin' is tarah luTi mahfil-e-saz-o-awaz
gul-e-naghma na koi barg-e-nawa kuchh na raha
Mohsin Zaidi 
(606) Peoples Rate This