Ghar Se Nikal Bhi Aaen Magar Yar Bhi To Ho
ghar se nikal bhi aaen magar yar bhi to ho
ji ko lage kahin koi kirdar bhi to ho
ye kya ki barg-e-zard sa TuTe bikhar gae
aandhi chale hawaon ki yalghaar bhi to ho
sar ko abas hai sang-e-tawatur ka samna
sahn-e-makan mein shaKH-e-samar-bar bhi to ho
anmol hum guhar hain magar tere waste
bik jaen koi aisa KHaridar bhi to ho
kaghaz ki kashtiyon mein samundar lapeT len
pahlu mein tere qurb ki patwar bhi to ho
sab ko usi ke lahje ki tauqir chahiye
'mohsin' kisi ko mir sa aazar bhi to ho
Mohsin Jalganvi 
(560) Peoples Rate This