Nazar Mila Ke Zara Dekh Mat Jhuka Aankhen
nazar mila ke zara dekh mat jhuka aankhen
baDha rahi hain nigahon ka hausla aankhen
jo dil mein aks hai aankhon se bhi wo chhalkega
dil aaina hai magar dil ka aaina aankhen
wo ek sitara tha jaane kahan gira hoga
KHala mein DhunD rahi hain na jaane kya aankhen
gham-e-hayat ne fursat na di Thaharne ki
pukarti hi rahi hain mujhe sada aankhen
ye us ka tarz-e-taKHatub bhi KHub hai 'mohsin'
ruka ruka sa tabassum KHafa KHafa aankhen
Mohsin Bhopali 
(832) Peoples Rate This