Talluqat Ki Duniya Ka Haal Kya Kahiye

talluqat ki duniya ka haal kya kahiye

ki marna sahl hai jina muhaal kya kahiye

unhen jo raaziq-e-kul ko bhula ke karte hain

gadagaran-e-zaman se sawal kya kahiye

adab ki mahfilon aur din ki majalis mein

na kaif-e-haal na lutf-e-maqal kya kahiye

hasin aaj utar aae husn-bazi par

ye josh-o-tarz-e-numud-e-jamal kya kahiye

haram ho gai angur-o-jau ki sada kashid

lahu gharib ka Thahra halal kya kahiye

fasana-sazo haq-amoz-o-jabir-o-rahman

hai pur-tazad bashar ka kamal kya kahiye

bas ek naqsh hai charbe usi ke uThte hain

fasana-ha-e-uruj-o-zawal kya kahiye

tamam chizen haDapne ke baad bhi bhuki

siyasat aisi hai lanat-maal kya kahiye

mizaj-e-dahr hai goya mizaj aurat ka

abhi hai amn bhi jang-o-jidal kya kahiye

tamam chizen farawan bhi hain garan bhi hain

hai ek sidq-o-sadaqat ka kal kya kahiye

adib-o-naqid-o-naqqash-o-ahl-e-raqs-o-ghina

chalen KHushi se hukumat ki chaal kya kahiye