Kaun Jaane Kitni Baqi Kis Ke Paimane Mein Hai
kaun jaane kitni baqi kis ke paimane mein hai
jitna jis ka zarf hai utni hi mai-KHane mein hai
ye tera ehsan hai jo tu ne apna gham diya
gham mein Dhal jaane ki aadat tere diwane mein hai
kya meri ruswaiyon mein teri ruswai nahin
nam tera bhi to shamil mere afsane mein hai
aansuon mein jagmagati hain teri parchhaiyan
kya charaghan ka ye manzar dal ke virane mein hai
kah rahi hai mujh se 'mohan' chashm-e-saqi bar bar
mai-kashi ka lutf pi kar hi sambhal jaane mein hai
Mohan Javidani 
(636) Peoples Rate This