Husn Ki Jitni BaDhin Ranaiyan
husn ki jitni baDhin ranaiyan
ishq ke sar ho gain ruswaiyan
us nigah-e-naz ka aalam na puchh
chhu gai jo qalb ki gahraiyan
wo harim-e-naz mein bechain hain
yaad aati hain meri tanhaiyan
un hasin aaankhon mein aansu aa gae
aah mere ishq ki ruswaiyan
mahfil-e-duniya ko Thukra dun magar
jalwa-farma hain teri ranaiyan
husn ke daman pe dhabba aa gaya
dur ja pahunchen meri ruswaiyan
mere qadmon mein hai aish-e-jawedan
tere gham ki hain karam-farmaiyan
ishq ki fitrat hai 'arif' bebasi
chal nahin saktin teri KHud-araiyan
Mohammad Usmaan Arif 
(1377) Peoples Rate This