Achchhi Baaten
pyare bachcho tum ek kaam karo
apni neki se paida nam karo
ba-adab ba-nasib hota hai
tum buzurgon ka ehtiram karo
be-adab be-nasib hota hai
is liye sab ko tum salam karo
tum se naraaz ho agar koi
apni baaton se us ko ram karo
apne dushman se KHud gale mil kar
sare shikwe-gile tamam karo
jis kisi se milo to hans ke milo
narm lahje mein phir kalam karo
rah mein jab mile koi majbur
chhoD kar apna us ka kaam karo
baiThne se jahan mile neki
aisi majlis ka ehtimam karo
KHub mehnat karo paDhai mein
bas yahi kaam subh-o-sham karo
apne kirdar ke sahaare tum
ilm ka shauq sab mein aam karo
ilm hi la-zawal daulat hai
mushtahar bas yahi payam karo
Mohammad Sharfuddin Sahil 
(820) Peoples Rate This