Hum Sher Sunate Hain Mafhum Tumhaara Hai
hum sher sunate hain mafhum tumhaara hai
gum-karda-e-manzil hain malum tumhaara hai
auraq-e-pareshan hain naqqash kise jaanen
bas harf hamare hain marqum tumhaara hai
ye naghma-e-hasti bhi mansub tumhin se hai
aahang tumhaara hai manzum tumhaara hai
jo ishq samajh baiThe kab un ko KHabar hogi
har rang mein ek jalwa-e-masum tumhaara hai
jholi mein faqiron ki baKHshi hui daulat hai
dil ka jo sitara hai maqsum tumhaara hai
ye qissa-e-jaan yun hi mashhur nahin hota
lazim to hamara tha malzum tumhaara hai
kyun shahr ki galiyon mein azkar ye rahta hai
marhum tumhaara tha marhum tumhaara hai
Mohammad Khalid 
(599) Peoples Rate This