Ummid

parson ne kal ko pala tha

parwan chaDhaya kal ne aaj

aur aaj ki kokh se farda janm le raha hai

jaise zamin ne suraj se zindagi pai thi

aur chand ko zamin se rizq pahunch raha hai

suraj zamin ka mazi aur chand us ka mustaqbil hai

jaise jamadat se nabaatat se haiwanat ke baad insan paida ho gaya

to zindagi ka safar yahan pahunch kar ruk jaega kya

kya nietzsche ka insan-e-baala ba-qaul-e-zardshut ke auraq hi mein dafn ho kar rah jaega

kya iqbaal ka shahin qasr-e-sultani ke gumbad hi mein basera kar lega

kya quran ke mutabiq insan ka muntaha KHuda nahin

to kya hum KHuda ki jaanib mahw-e-safar hain

aur jab hum KHuda tak pahunch jaenge to kya zindagi ka safar KHatm ho jaega

aur kya is maqam par waqt tham jaega tariKH tamam ho jaegi

ya wahan se ek aur jahan shurua hoga

ek naya aalam ek nai zindagi

ek naya KHuda?

waise agar KHuda hi ibtida aur KHuda hi intiha hai

to kya ibtida aur intiha ki taKHsis be-mani nahin

jaise jab daera mukammal ho jae to us ki ibtida aur intiha donon miT jati hain

to kya haqiqat ek kaamil daera hai ibtida aur intiha ke baghair

agar aisa hai to harkat kahan se aai

kahin ye daera phailta aur sikuDta to nahin rahta

kya waqt ka ruKH mazi se haal se mustaqbil ki jaanib hi rahta hai

ya mustaqbil se haal se mazi ki taraf bhi ho sakta hai

kya insan se haiwanat se nabaatat se jamadat ko lauTna bhi mumkin hai

aur kya ab aisa hi to nahin ho raha

zahir hai insan par KHuda ka rang to chaDh nahin raha

albatta haiwani sifat ne zarur ghar kar liya hai is mein

shahr-e-insan se shahr-e-KHuda ki jaanib to hum ja nahin rahe

kahin hum qadam-ba-qadam jangal ki taraf to nahin palaT rahe

kya hamari mazi-parasti hamein

haiwanat se nabaatat se jamadat tak to nahin le jaegi

kya hum pichhe muD kar dekhne ke jurm mein patthar ke ho kar to nahin rah jaenge

lekin kahte hain ki na-umid nahin hona chahiye ki na-umidi kufr hai

aaKHir jamadat se pahle bhi to kuchh maujud hoga

bhai, KHuda to tha us waqt bhi

aur agar KHuda hi hamara muntaha hai

to aage baDh kar na sahi

pichhe muD kar sahi

hum use pa hi lenge

bas iman mazbut hona chahiye

fana baqa aur laqa ki manzilen zarur aaengi

hum pur-ummid hain