Meri Wafaen Yaad Karoge
meri wafaen yaad karoge
rooge fariyaad karoge
mujh ko to barbaad kiya hai
aur kise barbaad karoge
hum bhi hansenge tum par ek din
tum bhi kabhi fariyaad karoge
mahfil ki mahfil hai ghamgin
kis kis ka dil shad karoge
dushman tak ko bhul gae ho
mujh ko tum kya yaad karoge
KHatm hui dushnam-taraazi
ya kuchh aur irshad karoge
ja kar bhi nashad kiya tha
aa kar bhi nashad karoge
chhoDo bhi 'tasir' ki baaten
kab tak is ko yaad karoge
Mohammad Deen Taseer 
(843) Peoples Rate This