Sal-e-nau Mubarak
mubarak mubarak naya sal sab ko
na chaha tha hum ne tu hum se juda ho
magar kis ne roka hai bahti hawa ko
jo hum chahte hain wo kaise bhala ho
ai jate baras tujh ko saunpa KHuda ko
mubarak mubarak naya sal sab ko
mubarak ghaDi mein ye hum ahd kar len
ba-sad-shan hum zindagi mein sanwar len
gulon ki tarah gulistan mein nikhar len
banen hum bhi suraj gagan mein ubhar len
mubarak mubarak naya sal sab ko
andheron ne luTi ujalon ki daulat
uDa le gaya waqt ek KHwab-e-rahat
na lauTegi biti hui koi saat
jo ab bhi na jage to hogi qayamat
mubarak mubarak naya sal sab ko
umiden hain rahen azaem sawari
KHabar de rahi hai ye baad-e-bahaari
mahakti hui manzilen pyari pyari
ki sadiyon se takti hain rahen hamari
mubarak mubarak naya sal sab ko
mubarak mubarak naya sal sab ko
Mohammad Asadullah 
(1463) Peoples Rate This