Ek Ittifaqi Maut Ki Rudad
sarasar ittifaqi maut thi
us ne kaha tha mujh ko jaana hai
so wo aise gaya jaise zamin se ghas jati hai
sarasar ittifaqan
panw chalne ke liye hote hain
itna to sabhi taslim karte hain
to aise mein agar miTTi ki uryani shikayat-gar bhi ho jae
to us par aur miTTi Dal dete hain
so hum ne Dal di miTTi-pe-miTTi
ittifaqan
ye to hota hai
sarasar ittifaqi hadisa tha
us ne KHud likha tha
duniya beach aana ittifaqi amr hai
jaana sarasar hadsati
to us par to adalat ne bhi kuchh hujjat nahin ki
us ne KHud likha tha
hujjat nafsiyati aariza hai
so adalat ne bila taftish use jaane diya
jaise zamin se ghas jati hai
sarasar ittifaqan
bil-umum aisa hi hota hai
hamesha ittifaqan
Mohammad Anvar Khalid 
(612) Peoples Rate This