Kabhi Tujhse Aisa Bhi Yarana Tha
kabhi tujh se aisa bhi yarana tha
musalle se uThna gawara na tha
yunhi is taraf hum chale aae the
kisi ne bhi hum ko pukara na tha
wo ek mauj thi sar uThati hui
kahen kaise dil se kinara na tha
chamak jis ki kal shab maza de gai
kahin aaj ki shab wo tara na tha
bahut KHush hue aaina dekh kar
yahan koi sani hamara na tha
sahar ho rahi thi magar raat ne
libas-e-urusi utara na tha
Mohammad Alvi 
(756) Peoples Rate This