Abhi Rang-e-rabt Ayan Hai Qaus-e-KHayal Se
abhi rang-e-rabt ayan hai qaus-e-KHayal se
mujhe aur upar uchhaal sath-e-visal se
tere shahparon mein zaman makan ke hain fasle
tu uqab hai to numud kar par-o-baal se
kabhi ban paDe to ye kar-e-KHair bhi kam nahin
kisi aaine ko bacha lun gard-e-malal se
mere husn-e-azmat-e-sabr-o-zabt ke nam hain
mujhe jo bhi pahunchin aziyyaten meri aal se
kai sar jhukenge meri ana ki shikast par
kai hashr jag uThenge mere zawal se
Mohammad Ahmad Ramz 
(644) Peoples Rate This