Hawa Se Baada NichoDen Kali Ko Jam Karen
hawa se baada nichoDen kali ko jam karen
sukut-e-rang-e-chaman se zara kalam karen
hamein to koi bhi pahchanta nahin hai yahan
nigah kis se milaen kise salam karen
zamana is pe tula hai KHirad ki baat rahe
hamein ye zid hai ki uncha junun ka nam karen
faza hai gosh-bar-awaz chup hain ahl-e-nawa
ab is adhuri kahani ko hum tamam karen
tumhaare jam ko pahle nazar se chhalka den
phir apne hosh mein aa kar tawaf-e-jam karen
kisi ghazal mein bhi ab nahin ram-e-wahshat
hum apne sehr-e-tamanna se kis ko ram karen
KHulus-e-dil ka sila soz aarzu ka guhar
isi guhar 'faridi' charagh-e-sham karen
Moghisuddin Fareedi 
(546) Peoples Rate This