Shikwe Ke Nam Se Be-mehr KHafa Hota Hai
shikwe ke nam se be-mehr KHafa hota hai
ye bhi mat kah ki jo kahiye to gila hota hai
pur hun main shikwe se yun rag se jaise baja
ek zara chheDiye phir dekhiye kya hota hai
go samajhta nahin par husn-e-talafi dekho
shikwa-e-jaur se sargarm-e-jafa hota hai
ishq ki rah mein hai charKH-e-makaukab ki wo chaal
sust-rau jaise koi aabla-pa hota hai
kyun na Thahren hadaf-e-nawak-e-bedad ki hum
aap uTha late hain gar tir KHata hota hai
KHub tha pahle se hote jo hum apne bad-KHwah
ki bhala chahte hain aur bura hota hai
nala jata tha pare arsh se mera aur ab
lab tak aata hai jo aisa hi rasa hota hai
KHama mera ki wo hai bar-bud-e-bazm-e-suKHan
shah ki madh mein yun naghma-sara hota hai
ai shahanshah-e-kawakib sipah-o-mehr-e-alam
tere ikram ka haq kis se ada hota hai
sat aqlim ka hasil jo faraham kije
to wo lashkar ka tere nal-e-baha hota hai
har mahine mein jo ye badar se hota hai hilal
aastan par tere mah nasiya sa hota hai
main jo gustaKH hun aain-e-ghazal-KHwani mein
ye bhi tera hi karam zauq-faza hota hai
rakhiyo 'ghaalib' mujhe is talKH-nawai mein muaf
aaj kuchh dard mere dil mein siwa hota hai
Mirza Ghalib 
(2696) Peoples Rate This