Ghair Len Mahfil Mein Bose Jam Ke
ghair len mahfil mein bose jam ke
hum rahen yun tishna-lab paigham ke
KHastagi ka tum se kya shikwa ki ye
hathkanDe hain charKH-e-nili-fam ke
KHat likhenge garche matlab kuchh na ho
hum to aashiq hain tumhaare nam ke
raat pi zamzam pe mai aur subh-dam
dhoe dhabbe jama-e-ehram ke
dil ko aankhon ne phansaya kya magar
ye bhi halqe hain tumhaare dam ke
shah ke hai ghusl-e-sehhat ki KHabar
dekhiye kab din phiren hammam ke
ishq ne 'ghaalib' nikamma kar diya
warna hum bhi aadmi the kaam ke
Mirza Ghalib 
(1185) Peoples Rate This