Yaro Mujhe Muaf Rakho Main Nashe Mein Hun
yaro mujhe muaf rakho main nashe mein hun
ab do to jam KHali hi do main nashe mein hun
ek ek qurt daur mein yun hi mujhe bhi do
jam-e-sharab pur na karo main nashe mein hun
masti se darhami hai meri guftugu ke bich
jo chaho tum bhi mujh ko kaho main nashe mein hun
ya hathon hath lo mujhe manind-e-jam-e-mai
ya thoDi dur sath chalo main nashe mein hun
mazur hun jo panw mera be-tarah paDe
tum sargiran to mujh se na ho main nashe mein hun
bhagi namaz-e-juma to jati nahin hai kuchh
chalta hun main bhi Tuk to raho main nashe mein hun
nazuk-mizaj aap qayamat hain 'mir' ji
jun shisha mere munh na lago main nashe mein hun
Mir Taqi Mir 
(682) Peoples Rate This