Yan Sarkashan Jo Sahab-e-taj O Lawa Hue
yan sarkashan jo sahab-e-taj o lawa hue
pamal ho gae to na jaana ki kya hue
dekhi na ek chashmak-e-gul bhi chaman mein aah
hum aaKHir bahaar-e-qafas se raha hue
pachhtaoge bahut jo gae hum jahan se
aadam ki qadar hoti hai zahir juda hue
tujh bin dimagh sohbat-e-ahl-e-chaman na tha
gul wa hue hazar wale hum na wa hue
sar de ke 'mir' hum ne faraghat ki ishq mein
zimme hamare bojh tha bare ada hue
Mir Taqi Mir 
(475) Peoples Rate This