Kaisa Chaman Asiri Mein Kis Ko Idhar KHayal
kaisa chaman asiri mein kis ko idhar KHayal
parwaz KHwab ho gai hai baal-o-par KHayal
mushkil hai miT gae hue naqshon ki phir numud
jo suraten bigaD gain un ka na kar KHayal
mu ko abas hai tab kali yun hi tang hai
us ka dahan hai wahm-o-guman-o-kamar KHayal
ruKHsar par hamare Dhalakne ko ashk ke
dekhe hai jo koi so kare hai guhar KHayal
kis ko dimagh-e-sher-o-suKHan zoaf mein ki 'mir'
apna rahe hai ab to hamein beshtar KHayal
Mir Taqi Mir 
(479) Peoples Rate This